АҚШнинг Лас-Вегас шаҳридаги “Т-Моbile” аренада ўтказилган йилнинг энг сўнгги рақамли UFC турниридан сўнг, вазн тоифасидан қатъи назар энг кучли жангчилар ҳамда барча вазн тоифалари рейтинги янгиланди.
Ярим оғир вазн тоифасида иштирок этувчи ўзбекистонлик ММА устаси Богдан Гусков собиқ чемпион Ян Блаховичга қарши жангдаги дуранг натижасидан сўнг бир поғона юқорилаб, 10-ўринга кўтарилди.
UFC 323 турнирининг марказий жангида амалдаги чемпион Мераб Двалишвили устидан ғалаба қозонган россиялик Петр Ян UFCнинг вазн тоифасидан қатъи назар энг яхши жангчилар рўйхатига киритилди ва унда олтинчи ўринни эгаллади. Чемпионлик камаридан айрилган Двалишвили эса рейтингда беш поғона пастлади ва 8-ўринга жойлаштирилди. Энг енгил вазн тоифаси рейтингида эса чемпионлик ўрнидан биринчи рақамли даъвогар позициясига кўчди.
UFCнинг минимал вазн собиқ чемпиони Алешандре Пантожа эса Жошуа Ван билан жангнинг илк сонияларида жароҳат олгани ва камарни бой бергани сабабли P4P рейтингида тўрт поғона пастлади ва 9-ўринга тушди. Унинг рақиби — янги чемпион Жошуа Ван эса умумий рўйхатда 11-ўринни эгаллади.
P4P рейтингидаги ушбу ўзгаришлар туфайли ўрта вазн чемпиони Ҳамзат Чимаев кучли учликка кириб, Двалишвилининг ўрнини эгаллади. Ярим ўрта вазн чемпиони Ислом Махачев биринчи, енгил вазн чемпиони Илия Топурия эса иккинчи ўринда ўзгаришсиз қолди.
