"Барселона"нинг бразилиялик вингери Рафинья Испания Ла Лигаси-2025/2026 йилги мавсумида жароҳати туфайли бир ойни ўтказиб юборганига қарамай, голлар сони бўйича "Реал"даги ҳамюрти Винисиус Жуниорни ортда қолдирди.

Испания чемпионатининг 16-туридан ўрин олган "Осасуна"га (2:0) қарши ўйиндаги иккита гол Рафинья учун жорий мавсумдаги бешинчи ва олтинчи гол бўлди. Винисиус Жуниор Ла Лигада 16 та учрашувда бешта гол урган. Ўз навбатида Рафинья атиги 10 та ўйинда ҳаракат қилди, у олтита ўйинни жароҳат сабаб ўтказиб юборди (7-турдан 12-тургача).

Испания чемпионатининг 2025/2026 йилги мавсумдаги энг яхши тўпурари "Реал" форварди Килиан Мбаппе бўлиб, унинг ҳисобида 16 та гол бор. Иккинчи ўринда 11 та гол урган "Барселона" ҳужумчиси Ферран Торрес бормоқда.