2026 йилда мамлакатимизда Ўзбекистон медиа футбол лигасининг илк мавсуми бўлиб ўтади.
Бу ҳақда куни кеча Спорт вазирлиги, Миллий Олимпия қўмитаси ҳамда Ўзбекистон футбол ассоциацияси мутасаддилари иштирокида ўтказилган конференцияда эълон қилинди.
Ўзбекистон медиа футбол лигасининг (United MFL) дастлабки мавсумига бағишланган конференцияда сўзга чиққан таниқли футболчи ва мураббийлар, мутахассислар мамлакат спортида илк бор амалга оширилаётган ушбу лойиҳа соғлом турмуш тарзини тарғиб этиш, футболга бўлган қизиқишни янада оширишга хизмат қилиши билан аҳамиятли эканини таъкидлади.
Тадбирда айтилганидек, чемпионатга келгуси йилнинг 1 мартида старт берилади. Мавсум 14 июнга қадар давом этади. Унда 16 жамоа иштирок этади.
Шу билан бирга, келгусида United MFL доирасида кубок беллашувларини ташкил этиш режалаштирилмоқда.
