UFC енгил вазн тоифасининг собиқ чемпиони Ҳабиб Нурмагомедов “Манчестер Сити” базасида меҳмон бўлди. Бу ҳақда 37 ёшли спортчи ўзининг ижтимоий тармоқлардаги саҳифасида маълум қилди.

“Агар улар мана шу пушти либосларда бўлишса, машғулот залимга киритмаган бўлардим. Улар кулишди, лекин мен ҳазиллашмаётганимни тушунишмади”, дея у улашган суратга изоҳ қолдирди.

Учрашувдан сўнг Нурмагомедов Ўзбекистон миллий терма жамоаси ҳимоячиси Абдуқодир Ҳусанов ҳақидаги фикрларини ҳам билдириб ўтди.

“Абдуқодир Ҳусанов билан бир соат давомида бирга бўлдик, у умуман гапирмади. Яратган сени паноҳида асрасин. Сендан Ўзбекистон халқининг умиди катта. Ҳеч қачон бўшашма ва фақат олдинга интил”, дея ёзди собиқ чемпион.

Эслатиб ўтамиз, Ҳабиб Нурмагомедов UFC’даги сўнгги жангини 2020 йил 24 октябрь куни Абу-Дабида бўлиб ўтган UFC 254 турнирида ўтказган. У вақтинчалик UFC камари соҳиби, америкалик Жастин Гетжига қарши октагонга чиқиб, иккинчи раундда бўғиш усули билан ғалаба қозонган.

Мазкур ғалаба Нурмагомедов учун фаолиятидаги 29-ғалаба бўлди. Жангдан сўнг Ҳабиб аралаш жанг санъатидаги фаолиятини якунлаганини эълон қилган эди.

“Манчестер Сити” эса “Челси”га қарши дурангдан сўнг очколари сонини 42 тага етказиб, “Астон Вилла” билан тенглашди ва тўплар нисбатига кўра АПЛ турнир жадвалида 2-ўринга кўтарилди. Пешқадам “Арсенал” ҳисобида 48 очко бор.

Жамоа навбатдаги учрашувини Англия Премьер лигасининг 21-тури доирасида “Брайтон”га қарши ўтказади. Ушбу баҳс 8 январга ўтар кечаси Тошкент вақти билан соат 00:30 да старт олади.