UFC yengil vazn toifasining sobiq chempioni Habib Nurmagomedov “Manchester Siti” bazasida mehmon bo‘ldi. Bu haqda 37 yoshli sportchi o‘zining ijtimoiy tarmoqlardagi sahifasida ma’lum qildi.

“Agar ular mana shu pushti liboslarda bo‘lishsa, mashg‘ulot zalimga kiritmagan bo‘lardim. Ular kulishdi, lekin men hazillashmayotganimni tushunishmadi”, deya u ulashgan suratga izoh qoldirdi.

Uchrashuvdan so‘ng Nurmagomedov O‘zbekiston milliy terma jamoasi himoyachisi Abduqodir Husanov haqidagi fikrlarini ham bildirib o‘tdi.

“Abduqodir Husanov bilan bir soat davomida birga bo‘ldik, u umuman gapirmadi. Yaratgan seni panohida asrasin. Sendan O‘zbekiston xalqining umidi katta. Hech qachon bo‘shashma va faqat oldinga intil”, deya yozdi sobiq chempion.

Eslatib o‘tamiz, Habib Nurmagomedov UFC’dagi so‘nggi jangini 2020 yil 24 oktyabr kuni Abu-Dabida bo‘lib o‘tgan UFC 254 turnirida o‘tkazgan. U vaqtinchalik UFC kamari sohibi, amerikalik Jastin Getjiga qarshi oktagonga chiqib, ikkinchi raundda bo‘g‘ish usuli bilan g‘alaba qozongan.

Mazkur g‘alaba Nurmagomedov uchun faoliyatidagi 29-g‘alaba bo‘ldi. Jangdan so‘ng Habib aralash jang san’atidagi faoliyatini yakunlaganini e’lon qilgan edi.

“Manchester Siti” esa “Chelsi”ga qarshi durangdan so‘ng ochkolari sonini 42 taga yetkazib, “Aston Villa” bilan tenglashdi va to‘plar nisbatiga ko‘ra APL turnir jadvalida 2-o‘ringa ko‘tarildi. Peshqadam “Arsenal” hisobida 48 ochko bor.

Jamoa navbatdagi uchrashuvini Angliya Premyer ligasining 21-turi doirasida “Brayton”ga qarshi o‘tkazadi. Ushbu bahs 8 yanvarga o‘tar kechasi Toshkent vaqti bilan soat 00:30 da start oladi.