Бундеслиганинг 16-турида "Бавария" ўз майдонида "Вольфсбург"ни 8:1 ҳисобида мағлубиятга учратди.
"Бавария" бош мураббийи Венсан Компани учун бу ўйин мюнхенликлар бошқарувидаги Бундеслигадаги 50-ўйин бўлди.
Бельгиялик бош мураббий сифатида Бундеслигадаги дастлабки 50 ўйинда 150 имкониятдан 126 очко тўплади. Бу Германия чемпионати юқори дивизиони тарихидаги иккинчи натижадир. Компани "Бавария"нинг бошқа бир собиқ мураббийи Ханси Фликнинг (125 очко) натижасини ортда қолдирди. "Бавария"нинг яна бир собиқ мураббийи рекордчи бўлиб қолмоқда - Хосеп Гвардиола Бундеслиганинг дастлабки 50 ўйинида 132 очко тўплашга муваффақ бўлган.













