"Барселона" футболчилари дарвозабон Жоан Гарсияни мақташда давом этмоқда. Пайшанба куни 24 ёшли испаниялик футболчи "кўк-анорранглилар"га "Расинг"га қарши ўйинда (2:0) дарвозани дахлсиз сақлаб, мамлакат кубогининг 1/4 финалига йўлланмани қўлга киритишга ёрдам берди.
"Жоан Гарсия ҳақида нима дейишим мумкин? Аввалига у чемпионат ўйинларида бизни қутқариб қолганди, энди эса Кубок ўйинларида ҳам шундай қилмоқда. Ҳозирда у дунёнинг энг яхши дарвозабони!," - дея ярим ҳимоячи Марк Касадонинг сўзларини келтиради Managing Barca.
"Барселона" жорий мавсум олдидан "Эспаньол"дан Жоан Гарсияни 25 млн евро эвазига сотиб олди. Кипер Ханс-Дитер Флик жамоаси сафида 19 та ўйин ўтказиб, жами 16 та гол ўтказиб юборган.
