Бугун ФИФА дунё терма жамоаларининг навбатдаги рейтингини эълон қилди. Унга кўра, Ўзбекистон терма жамоаси ўзи эгаллаб турган ўриндан бир поғона пастлаб, 59-ўринга жойлашди.

Терма жамоамиз июль ойида ҳеч қандай ўртоқлик ўйини ўтказмади, натижада тўплаб турган очколар сони ҳам деярли ўзгармади — 566 балл. Камерун терма жамоаси бирданига 20та ўрин кўтарилиши эвазига терма жамоамиз битта ўрин пастга тушди. Ўзбекистон билан 14 август куни ўртоқлик ўйини ўтказиши керак бўлган, аммо эндиликда ўзига бошқа рақиб топган Туркия эса биз билан "қўшни" поғонада жойлашган — 58-ўрин.

Шу пайтгача Осиёда учинчи ўринни эгаллаб турган Жанубий Корея кутилмаганда бирданига 13 поғона "қулади" ва 56-ўринга жойлашди. Натижада 52-поғонани эгаллаб турган Эрон қитъамизнинг учинчи терма жамоасига айланиб олди. Австралияда ҳам пасайиш кузатилган. "Кенгурулар" 6та ўрин пастлашган (46-ўрин). Япония эса 37-ўрнини сақлаб қолган.

ЖЧ-2014 плей-офф босқичидаги рақибимиз Иордания эса 5 ўрин кўтарилиб, 71-поғонага чиқиб олди. Осиё кубоги-2015 саралашида биз билан бир гуруҳдан ўрин олган БАА эса 1та ўрин юқорига силжиган (84-ўрин). Гонконг (+4) ва Вьетнам (-11) эса мос равишда 144 ва 156-ўринларни эгаллаб туришибди.

Испания терма жамоаси рейтингни бошқаришда давом этмоқда. Умуман олганда, рейтингнинг юқори қисмида ҳеч қандай ўзгариш юз бермаган. Кейинги ўринларни Германия, Колумбия, Аргентина, Голландия, Италия терма жамоалари эгаллаб туришибди.

Рейтингнинг тўлиқ кўриниши билан ФИФА расмий сайтида танишиб олишингиз мумкин.