Эртага Индонезия пойтахти Жакарта шаҳрида XVIII Осиё кубоги баҳсларига старт берилади. Мусобақанинг «C» гуруҳида иштирок этаётган Ўзбекистон миллий терма жамоаси илк учрашувини 28 январь куни Тожикистон терма жамоасига қарши ўтказади. Беллашув маҳаллий вақт билан соат 19:00 (Тошкент вақти билан соат 17:00) да бошланади.

Бугун Нодир Элибоев бошчилигидаги жамоамиз аъзолари Жакарта шаҳридаги спорт мажмуасида машғулот ўтказишди. Эрталабки назарий тайёргарликдан келиб чиққан ҳолда бўлажак рақиб ўйин услубига қарши турли комбинациялар, стандарт вазиятлар устида иш олиб борилди. Шунингдек, ҳимоя ҳамда ҳужум чизиғи ўртасидаги боғламалар кўриб чиқилди, бошланғич ва захира тўртликлар таркиби яна бир бор кўздан кечирилди.

Машғулотлар кўтаринки, ишчанлик ва жанговор кайфиятда олиб борилди. Йигитларимиз Осиё Кубоги ўйинларига ҳам жисмонан, ҳам руҳан яхши тайёргарлик билаб етиб келишмоқда. Насиб бўлса, индин бўлиб ўтадиган биринчи тур учрашувига терма жамоамиз чиройли, ҳужумкор ўйини билан мухлисларимизни хурсанд этади, деган умиддамиз.