Хитой ҳукумати футбол билан боғлиқ фаолият билан шуғулланишни 73 нафар шахс учун умрбод тақиқлади. Улар орасида Хитой футбол ассоциациясининг (ХФА) собиқ раиси Чен Сююан ҳамда миллий терма жамоанинг собиқ бош мураббийи Ли Те ҳам бор. Бу ҳақда Хитой Марказий телевидениеси (CCTV) хабар берди.

Маълум қилинишича, 29 январь, пайшанба куни Хитойнинг Жисмоний тарбия ва спорт ишлари бўйича бош бошқармаси, Жамоат хавфсизлиги вазирлиги ҳамда ХФА иштирокида футбол соҳасидаги коррупцияга бағишланган қўшма матбуот анжумани ўтказилган. Унда халқ суди томонидан айбдор деб топилган 73 киши футболга оид ҳар қандай фаолиятдан бутун умрга четлатилган. Шунингдек, 13 та клубга нисбатан молиявий жарималар қўлланган.

Эслатиб ўтамиз, 2024 йил март ойида ХФА собиқ раҳбари Чен Сююан 81 миллион юандан (тахминан 11,4 миллион доллар) ортиқ миқдорда пора олганликда айбланиб, умрбод қамоқ жазосига ҳукм қилинганди. Шунингдек, ХФА мусобақалар бўлимининг собиқ директори Хуан Сун 7 йилга, ассоциация раисининг собиқ ўринбосари Ли Юйи эса 11 йилга озодликдан маҳрум этилган. Хитой терма жамоасининг собиқ бош мураббийи, аввалроқ Англиянинг “Эвертон” клубида тўп сурган Ли Те ҳам порахўрлик айби билан умрбод қамоқ жазосини олган.

Қайд этилишича, Хитойда 2022 йил ноябрь ойидан буён футбол соҳасида коррупцияга қарши кенг кўламли кампания олиб борилмоқда. Таҳлилчиларга кўра, бу жараён давомийлиги ва қўлга олинганлар сони бўйича Хитой футболи тарихидаги энг йирик антикоррупсия кампанияси ҳисобланади.