Xitoy hukumati futbol bilan bog‘liq faoliyat bilan shug‘ullanishni 73 nafar shaxs uchun umrbod taqiqladi. Ular orasida Xitoy futbol assosiasiyasining (XFA) sobiq raisi Chen Syuyuan hamda milliy terma jamoaning sobiq bosh murabbiyi Li Te ham bor. Bu haqda Xitoy Markaziy televideniyesi (CCTV) xabar berdi.

Ma’lum qilinishicha, 29 yanvar, payshanba kuni Xitoyning Jismoniy tarbiya va sport ishlari bo‘yicha bosh boshqarmasi, Jamoat xavfsizligi vazirligi hamda XFA ishtirokida futbol sohasidagi korrupsiyaga bag‘ishlangan qo‘shma matbuot anjumani o‘tkazilgan. Unda xalq sudi tomonidan aybdor deb topilgan 73 kishi futbolga oid har qanday faoliyatdan butun umrga chetlatilgan. Shuningdek, 13 ta klubga nisbatan moliyaviy jarimalar qo‘llangan.

Eslatib o‘tamiz, 2024 yil mart oyida XFA sobiq rahbari Chen Syuyuan 81 million yuandan (taxminan 11,4 million dollar) ortiq miqdorda pora olganlikda ayblanib, umrbod qamoq jazosiga hukm qilingandi. Shuningdek, XFA musobaqalar bo‘limining sobiq direktori Xuan Sun 7 yilga, assosiasiya raisining sobiq o‘rinbosari Li Yuyi esa 11 yilga ozodlikdan mahrum etilgan. Xitoy terma jamoasining sobiq bosh murabbiyi, avvalroq Angliyaning “Everton” klubida to‘p surgan Li Te ham poraxo‘rlik aybi bilan umrbod qamoq jazosini olgan.

Qayd etilishicha, Xitoyda 2022 yil noyabr oyidan buyon futbol sohasida korrupsiyaga qarshi keng ko‘lamli kampaniya olib borilmoqda. Tahlilchilarga ko‘ra, bu jarayon davomiyligi va qo‘lga olinganlar soni bo‘yicha Xitoy futboli tarixidagi eng yirik antikorrupsiya kampaniyasi hisoblanadi.