Тошкентнинг «Пахтакор» жамоаси янги мавсумга тайёргарликнинг ҳал қилувчи босқичини ўтказиш учун бугун Туркиянинг Анталия шаҳрига жўнаб кетди.
Камолиддин Тожиев бошчилигидаги «шерлар» 4–17 февраль кунлари давомида Анталия йиғинида иштирок этишади. Мазкур йиғин мавсум олди тайёргарликнинг якуний қисми ҳисобланиб, унда асосий эътибор тактик ва жисмоний ҳолатни юқори даражага олиб чиқишга қаратилади.
Бош мураббий ушбу йиғинга 24 нафар футболчини жалб этган. Тайёргарлик жараёни нафақат машғулотлар, балки бой ўйин амалиёти билан ҳам давом этади. Режага кўра, «Пахтакор» Анталияда 6 та назорат баҳсида майдонга тушиши кўзда тутилган.
