«Эвертон» ва Сенегал терма жамоаси ҳужумчиси Илиман Ндиайе Африка Кубоги финалида «Реал» ҳамда Марокаш терма жамоаси ярим ҳимоячиси Браим Диас томонидан ижро этилган пенальти борасида ўз фикрларини билдирди. Сенегал терма жамоаси қўшимча вақтларда Марокаш устидан 1:0 ҳисобида ғалаба қозонди. Иккинчи бўлимга қўшиб берилган 24-дақиқада Браим 11 метрлик зарбани  «паненка» услубида ижро этди, бироқ тўпни Сенегал дарвозабони Эдуар Менди ушлаб олди. Ушбу зарбадан олдин пенальти белгиланиши бўйича баҳслар келиб чиққан ва натижада Сенегал жамоаси майдонни тарк этган эди.

«Мен қандайдир ҳурматсизликни ҳис қилдим. У бизни ҳақорат қилмоқчи эди демаяпман, лекин у содир бўлган воқеалардан кейин шунчаки ўзини кўрсатмоқчи бўлди. Билмадим, мен бундай зарба беришга таваккал қилган бўлармидим. Ваҳоланки, ўз мамлакатининг қиролига айланишига саноқли дақиқалар қолган эди. Улар кўп йиллардан бери ғалаба қозона олишмаётганди ва ягона чора — имкониятдан фойдаланиб гол уриш эди. Мен ичимда: «Ҳа, у ҳозир адашади, у адашади», деб ўйладим. Ва у ҳақиқатан ҳам хато қилди. Биз эса бунга ҳеч қандай муносабат билдирмадик. Ўйинни давом эттирдик. Шу сабабли, нима учун у бундай қилганини тушунмайман, лекин бундан хурсандман. Ўйлайманки, ўша вазиятдан кейин биз ғалаба қозонишимизни англаб етдик», — дея Ндиайенинг сўзларини келтирмоқда «The Times».