"Mилан", "Атлетико", "Фенербахче", "Чикаго Файр" ва Саудия Арабистони Про-лигасининг номи ошкор этилмаган клуби "Барселона" ҳужумчиси Роберт Левандовскийга таклиф билан чиқди. Польшалик ҳужумчи мавсум охиригача келажаги борасида бир қарорга келмоқчи эмас. Бу ҳақда Mundo Deportivo нашри хабар бермоқда.

Нашр маълумотига кўра, шартномаси 2026 йилнинг ёзида якунига етадиган ҳужумчи каталонияликлардан ҳаракат кутмоқда ва катта эҳтимол билан "кўк-анорранглилар" билан келишувни узайтиришга тайёр.

Роберт Левандовски 2022 йилда Мюнхеннинг "Бавария" клубидан "Барселона"га ўтганди. Ўшандан бери ҳужумчи Каталония жамоаси таркибида икки марта Испания чемпионлигини қўлга киритди, уч марта Испания Суперкубоги ва бир марта мамлакат кубогини қўлга киритди.

Жорий мавсумда польшалик футболчи клуб сафида барча мусобақаларда 29 та ўйин ўтказиб, барча турнирларда 13 та гол урган.