Январь ойида Майкл Кэррик мавсум якунига қадар "Манчестер Юнайтед" билан ишлаши эълон қилинган эди. Ўшандан бери "қизил иблислар" Премьер-лигада тўртта ғалаба ва бир дуранг қайд этишди. Кэррик ҳатто январь ойи якунларига кўра Англия чемпионатининг энг яхши мураббийи деб топилди.
"The Telegraph" нашрининг хабар беришича, Кэррикнинг муваффақиятлари "Манчестер Юнайтед"ни яқин келажакда уни жамоанинг тўлақонли бош мураббийи этиб тайинлашга мажбур қилмайди. Клуб шошилмоқчи эмас — янги мураббийни танлаш жараёни пухта ва услубий тарзда олиб борилади.
"Манчестер Юнайтед" айни дамда Премьер-лига турнир жадвалида тўртинчи поғонани эгаллаб турибди.
