Мадриднинг «Реал» клуби марказий ҳимоячиси Антонио Рюдигер жамоа билан амалдаги шартномасини узайтириши мумкин.
Аввалроқ, «қаймоқранглилар» жорий мавсум якунида шартномаси ниҳоясига етадиган 32 ёшли футболчи билан хайрлашиш ниятида эканликлари тахмин қилинган эди. Бироқ, Defensa Central нашрининг хабар беришича, «Реал» раҳбарияти германиялик ҳимоячи билан келишувни янгилаш масаласини кўриб чиқмоқда. Клуб мутасаддиларининг фикрича, Рюдигер ўзининг катта тажрибаси билан кийиниш хонасидаги муҳитни шакллантиришда, айниқса, жамоадаги кўплаб ёш ва истиқболли футболчилар учун ўрнак бўлишда муҳим рол ўйнаши мумкин.
Антонио Рюдигер 2022 йилдан буён «қироллик клуби» шарафини ҳимоя қилиб келмоқда. Жорий мавсумда у мадридликлар таркибида жами 11 та учрашувда иштирок этди.
