Мадриднинг «Реал» клуби бош мураббийи Альваро Арбелоа ярим ҳимоячи Жуд Беллингемнинг жароҳати борасида берилган саволга жавоб қайтарди.

Инглиз футболчиси «қаймоқранглилар»нинг сўнгги учта учрашувини ўтказиб юборди. Дастлаб у бир ой ичида сафга қайтиши тахмин қилинган бўлса-да, ярим ҳимоячининг тикланиш жараёни апрель ойига қадар чўзилиши мумкинлиги хабар қилинмоқда.

«Жуд эртагаёқ соғайиб кетиши учун кўп нарсадан воз кечишга тайёр бўлардим. У бизнинг етакчимиз ва дунёдаги энг кучлилардан биридир. Бироқ шундай футболчининг йўқлигида ҳам жамоамиз рақобатбардошлигини сақлаб қолаётгани мени қувонтиради. Бу юқори даража кўрсаткичидир. Шунга қарамай, имконим бўлганида, Беллингемнинг тезроқ қайтиши учун барча чораларни кўрган бўлардим», — деди Арбелоа матбуот анжуманида.

Шанба куни «Реал» Ла Лига доирасида сафарда «Осасуна» жамоасига қарши баҳс олиб боради.