Madridning «Real» klubi bosh murabbiyi Alvaro Arbeloa yarim himoyachi Jud Bellingemning jarohati borasida berilgan savolga javob qaytardi.
Ingliz futbolchisi «qaymoqranglilar»ning so‘nggi uchta uchrashuvini o‘tkazib yubordi. Dastlab u bir oy ichida safga qaytishi taxmin qilingan bo‘lsa-da, yarim himoyachining tiklanish jarayoni aprel oyiga qadar cho‘zilishi mumkinligi xabar qilinmoqda.
«Jud ertagayoq sog‘ayib ketishi uchun ko‘p narsadan voz kechishga tayyor bo‘lardim. U bizning yetakchimiz va dunyodagi eng kuchlilardan biridir. Biroq shunday futbolchining yo‘qligida ham jamoamiz raqobatbardoshligini saqlab qolayotgani meni quvontiradi. Bu yuqori daraja ko‘rsatkichidir. Shunga qaramay, imkonim bo‘lganida, Bellingemning tezroq qaytishi uchun barcha choralarni ko‘rgan bo‘lardim», — dedi Arbeloa matbuot anjumanida.
Shanba kuni «Real» La Liga doirasida safarda «Osasuna» jamoasiga qarshi bahs olib boradi.
