Мадриднинг "Реал" клуби қайта сотиб олиш ҳуқуқидан фойдаланган ҳолда бир йўла уч нафар футболчисини ҳамёнбоп нархда қайтармоқчи. Бу ҳақда "90min" нашри хабар бермоқда.
Манбанинг маълумотларига кўра, "қаймоқранглилар" "Комо" марказий ҳимоячиси Хакобо Рамонни 8 миллион еврога, унинг жамоадоши — ҳужумкор ярим ҳимоячи Николас Пасни эса 9 миллион еврога сотиб олмоқчи. Шунингдек, Испания гранди "Штутгарт"нинг таянч ярим ҳимоячиси Чема Андресни 10 миллион евро эвазига ўз сафига қўшиб олишни режалаштирмоқда.
Эслатиб ўтамиз, аввалроқ "Реал" сафарда кутилмаганда "Осасуна"га 1:2 ҳисобида имкониятни бой берган эди. Агар "Барселона" навбатдаги баҳсда "Леванте"ни мағлуб этса, Альваро Арбелоа жамоаси Ла Лига турнир жадвалида иккинчи ўринга тушиб кетади.
