Мадриднинг «Реал» клуби ҳужумчиси Винисиус Жуниор Чемпионлар лигаси доирасида «Манчестер Сити»га қарши кечган баҳсда (3:0) хет-трик қайд этган жамоадоши Федерико Вальвердега миннатдорчилик билдирди.
Уругвайлик футболчининг барча голлари биринчи бўлимда киритилди. Танаффусдан сўнг Винисиус майдон эгаларининг устунлигини янада мустаҳкамлаши мумкин эди, бироқ у пенальтини голга айлантира олмади.
«Феде, сен энг зўрисан ва бунга лойиқсан. Ҳаммаси учун раҳмат, биз сени яхши кўрамиз», — деб ёзиб қолдирди бразилиялик ҳужумчи учрашув якунланганидан кўп ўтмай ижтимоий тармоқлардаги саҳифасида.
