Яқинда матбуотда Аргентина ва Испания терма жамоалари ўртасидаги Финалиссимани Мадриддаги "Сантьяго Бернабеу" стадионида ўтказишга қарор қилингани ҳақида маълумот пайдо бўлди. Дастлаб жамоалар Қатарда ўйнаши керак эди, бироқ у ердаги ҳарбий ҳаракатлар туфайли ҳозир ушбу минтақада хавфсизлик кафолатланмаган.
Аргентина футбол ассоциацияси Мадридда ўйнашдан бош тортди. Бунинг сабаби тушунарли — бунда Испания ўз майдони устунлигига эга бўлар эди. Журналист Гастон Эдулнинг ижтимоий тармоқларда хабар беришича, КОНМЕБОЛ Аргентина футбол ассоциациясининг ушбу рад жавобини қўллаб-қувватлайди.
Яқин вақт ичида аргентиналиклар Европадаги муқобил стадионларни таклиф қилиши кутилмоқда. Агар барча томонлар бир тўхтамга кела олмаса, Финалиссима қолдирилади. Испания ва Аргентина терма жамоалари ўртасидаги ўйин 27 март кунига режалаштирилган эди.
