Италиянинг нуфузли La Gazzetta dello Sport нашри тарқатган хабарларга кўра, "Интер" ҳимоячиси Алессандро Бастони фаолиятини Испанияда давом эттиришга жуда яқин турибди.
Нарх масаласи ҳал бўлмоқда
Дастлаб "Интер" ўз етакчиси учун 80 миллион евро талаб қилаётган эди. Бироқ сўнгги маълумотларга кўра, клуб футболчини сотишга қарор қилган ва нархни сезиларли даражада пасайтирган. Эндиликда "нерадзуррилар" 50 миллион евро + бонуслар кўринишидаги таклифга рози бўлишлари айтилмоқда. Бундай нарх ҳозирги молиявий ҳолатда "Барселона" раҳбарияти учун анча қулай ва реал кўриниш олган.
Бастонининг танлови — фақат "Барселона"
Италиялик ҳимоячининг ўзи ҳам келажагини фақат Каталония клуби билан боғламоқчи. Хабарларда айтилишича, Бастони бошқа клублардан бўлаётган таклифларни кўриб чиқишни ҳам хоҳламаяпти ва унинг учун ягона устувор йўналиш "кўк-анорранглилар" сафи ҳисобланади.
Агар томонлар келишувни якунига етказишса, "Барселона" ҳимоя чизиғини дунёнинг энг иқтидорли марказий ҳимоячиларидан бири билан кучайтириб олади.
