«Манчестер Юнайтед» ва Англия терма жамоасининг собиқ ҳужумчиси Уэйн Руни 2010 йилги Жанубий Африка Республикасида (ЖАР) ўтган турнирни фаолиятидаги энг ёмон жаҳон чемпионати деб атади.
«ЖАРдагидан ёмонроғи бошқа бўлмайди. Ушбу турнир ҳеч қачон жаҳон чемпионатидек туюлмаган. Биз илк ўйинимиз — АҚШга қарши баҳсга кетаётган эдик. Атроф зимистон, бирорта ҳам мухлис йўқ. Одатда жаҳон чемпионати вақтида фанатлар ҳамма жойда бўлишади, атмосфера сезилиб туради. У ерда эса гўё ҳамма қирилиб кетгандек, ҳеч ким йўқ эди. Бу умуман жаҳон чемпионатига ўхшамасди», — дея Рунининг сўзларини келтиради ESPN.
