«Ювентус» ҳужумчи Душан Влаховичнинг агентлари билан муҳим музокаралар ўтказишга тайёргарлик кўрмоқда. Сербиялик футболчининг амалдаги шартномаси июнь ойи охиригача мўлжалланган.

Журналист Николо Скиранинг хабар беришича, «Ювентус» Влаховичга 2028 йил ўрталаригача мўлжалланган, йиллик маоши 7 миллион евро бўлган қисқа муддатли шартнома таклиф қилишга тайёр. Туринликлар ушбу таклиф Душанни клубда қолишга кўндиришидан умид қилишмоқда.

Агар томонлар келиша олишмаса, 26 ёшли Влахович ёзда эркин агент мақомида бошқа жамоага ўтиши мумкин бўлади.

2025/2026 йилги мавсумда Душан Влахович 18 та ўйинда майдонга тушиб, ўз ҳисобига олтита гол ва иккита голли узатмани ёздириб қўйди.