Германия терма жамоаси бош мураббийи Юлиан Нагельсманн агар ярим ҳимоячи Томас Мюллердан миллий жамоага қайтишни сўраса, у «ақлдан озган» бўлади.
Бу ҳақда футболчининг ўзи 2026 йил ёзида бўлиб ўтадиган жаҳон чемпионатида иштирок этиш имкониятларини баҳолай туриб баёнот берди.
«Менинг терма жамоага қайтиш имкониятларим қандай? Улар нолга тенг. Агар мураббий мени ЖЧга чақирса, демак у ақлдан озган. Унда унинг ҳақиқий муаммолари бор экан», — деди Мюллер Magenta TV эфирида.
Унинг ҳисоб-китобларига кўра, уни терма жамоага таклиф қилишлари учун камида 15 нафар ҳужумчи сафдан чиқиши керак бўлади.
Эслатиб ўтамиз, Мюллер 2025 йил ёзидан бери «Ванкувер» клуби шарафини ҳимоя қилиб келмоқда. Бунгача у бутун фаолиятини «Бавария»да ўтказган эди.
