Ярим ҳимоячи Жуд Беллингем яқинда жароҳатидан тикланди ва Англия терма жамоасига чақирув олди. «Реал» хавбеки Уругвайга қарши баҳсда (1:1 ҳисобидаги дуранг) иштирок этмади ва Томас Тухель уни Японияга қарши ўйинда майдонга тушириши тахмин қилинган эди. Бироқ, Жуд март ойидаги йиғиннинг иккинчи ўйинини ҳам ўтказиб юборади.

«Биз Беллингем борасида таваккал қилмаймиз. Футболчи мушак жароҳатидан сўнг формага кираётган вақтда нима содир бўлишини ҳеч қачон олдиндан айтиб бўлмайди», — дея Тухелнинг сўзларини BBC нашри келтирмоқда.

Томас Тухелнинг бу сўзлари «Реал»ни албатта хурсанд қилади. Мадридликлар учун Беллингемнинг муҳим ўйинлар, жумладан, Чемпионлар Лигаси чорак финалида «Бавария»га қарши баҳс олдидан яхши спорт формасида бўлиши жуда муҳим.

Англия ва Япония терма жамоалари ўртасидаги учрашув сешанба куни, 31 мартда бўлиб ўтади. «Уэмбли» стадионидаги ўйин Тошкент вақти билан тунги соат 23:45 да бошланади.