«Байер» ҳужумчиси Кристиан Кофаненинг агенти Лондоннинг «Арсенал» клуби ўз мижозининг хизматларига қизиқиш билдираётганини тасдиқлади.

19 ёшли футболчининг инглиз гранди сафига ўтиши мумкинлиги ҳақидаги хабарлар шу йилнинг март ойида тарқалган эди.

«Арсенал» Кофанега жиддий қизиқиш билдирмоқда — у Микель Артетага жуда манзур келган. Биз клуб билан алоқада бўлиб турибмиз, бироқ ҳозирда улар бор эътиборларини Премьер-лига чемпионлигини қўлга киритишга қаратишган.

Ҳозирча Кристиан учун асосий даъвогар кимлигини айтиш эрта, деб ўйлайман. Аммо унинг ҳам Артета каби испан тилида гаплашишини инобатга олсак, «Арсенал» бу пойгада пешқадамлик қилмоқда, дея оламан. Кофане — 100 миллион евролик ўйинчи. Клуб унинг тимсолида кейинги ўн йил учун юқори тоифали ҳужумчига эга бўлади», — деди агент Эрик Деполо Daily-Arsenal нашрига берган интервьюсида.

Маълумот учун, Transfermarkt портали Кристиан Кофанени 40 миллион еврога баҳолаган.