Мадриднинг «Реал» клуби марказий ҳимоячи Антонио Рюдигер билан янги шартнома бўйича музокараларни бошлади.
33 ёшли футболчининг амалдаги келишуви июнь ойи охирида ниҳоясига етади, бироқ «қаймоқранглилар» раҳбарияти ҳамкорликни давом эттириш ниятида. Журналист Пепе Альвареснинг маълумотига кўра, «Реал» Рюдигерга шартномани узайтириш бўйича расмий таклиф билан чиққан. Аввалроқ футболчининг ўзи ҳам Мадридда камида яна бир йил қолишга тайёрлиги ҳақида хабарлар тарқалган эди.
Антонио Рюдигер 2022 йил ёзидан бери «қироллик клуби» шарафини ҳимоя қилиб келмоқда. Жорий мавсумда марказий ҳимоячи 19 та ўйинда иштирок этиб, битта гол уришга муваффақ бўлди.
