Американинг машҳур ESPN нашри Англия Премьер-лигаси (АПЛ) тарихидаги энг ёмон 25 та трансфер рейтингини эълон қилди. Ушбу антирейтингни украиналик вингер Михаил Мудрикнинг «Шахтёр»дан «Челси»га ўтиши бошқариб берди.

Трансфер 2023 йилнинг қишида амалга оширилган бўлиб, Лондон клубига тахминан 70 миллион еврога тушган эди. Бу украиналик футболчилар учун тарихдаги энг қиммат трансфер сифатида қайд этилган. Бироқ Мудрик «Челси»нинг асосий ўйинчисига айлана олмади, кейинчалик эса допинг можароси сабабли сафдан четлатилди.

Бундан ташқари, рўйхатдан Украинанинг яна бир вакили — Андрей Шевченко ҳам жой олди. Унинг 2006 йилда «Милан»дан «Челси»га ўтиши рейтингда 17-ўринни эгаллади. Ўша вақтда лондонликлар ҳужумчи учун қарийб 44 миллион евро тўлашган ва бу ўша даврда клуб учун рекорд сумма ҳисобланган.

ESPN антирейтингининг кучли учлигидан, шунингдек, Антони ва Николя Пепе трансферлари ҳам жой олди.

ESPN талқинига кўра АПЛ тарихидаги энг ёмон 10 та трансфер:

1. Михаил Мудрик — «Шахтёр»дан «Челси»га

2. Антони — «Аякс»дан «Манчестер Юнайтед»га

3. Николя Пепе — «Лилль»дан «Арсенал»га

4. Али Диа — эркин агент сифатида «Саутгемптон»га

5. Дэнни Дринкуотер — «Лестер»дан «Челси»га

6. Рикки Альварес — «Интер»дан «Сандерленд»га

7. Ромелу Лукаку — «Интер»дан «Челси»га

8. Джейдон Санчо — «Боруссия» Дортмунддан «Манчестер Юнайтед»га

9. Томас Бролин — «Парма»дан «Лидс»га

10. Калвин Филлипс — «Лидс»дан «Манчестер Сити»га