Чемпионлар лигаси чорак финалининг дастлабки баҳсида Каталониянинг «Барселона» жамоаси ўз уйида Мадриднинг «Атлетико» клубига 0:2 ҳисобида имкониятни бой берди. Учрашувдан олган таассуротлари билан «кўк-анорранглилар» ҳимоячиси Жерар Мартин ўртоқлашди.
«Таркиблар тенг бўлган вақтда биз ўйинни назорат қилиб тургандик, аммо бундай баҳслардаги қизил карточка ҳамма нарсани ўзгартириб юборади. Шундай бўлса-да, бизда гол уриш учун вазиятлар бўлди, бироқ фойдалана олмадик. Рақибда имкониятлар камроқ эди, лекин улар ўз вазиятларидан унумли фойдаланишди. Биз ҳали ҳам қарама-қаршилик тақдирини ўз фойдамизга ҳал қила олишимизга ишонамиз», — дея футболчининг сўзларини келтирмоқда УЕФА матбуот хизмати.
