«Барселона» спорт директори Деку қайси футболчининг ўйини унда энг катта таассурот қолдирганини сўзлаб берди.

Португалиялик мутахассис бу борада ўзининг собиқ жамоадоши — бундан икки ўн йиллик аввал «кўк-анорранглилар» сафида тўрт йил давомида бирга тўп сурган Роналдиньони алоҳида эътироф этди.

«Мен техник жиҳатдан ундан кучлироқ ҳеч кимни кўрмаганман. У одамни ҳайратга соладиган, нутқдан маҳрум қиладиган ишларни амалга оширарди. Роналдиньо билан бирга ўйнаганманми ёки унга қаршими, у менда энг кучли таассурот қолдирган футболчи бўлиб қолади. У энг кўп соврин юртган ўйинчи эмасдир, лекин айнан у энг ёрқин футбол намойиш этарди», — дея Декунинг сўзларини келтирмоқда Mundo Deportivo.

Эслатиб ўтамиз, бразилиялик ва португалиялик юлдузлар 2008 йилнинг ёзида, жамоа бошқарувига Хосеп Гвардиола келган вақтда «Барса»ни тарк этишган эди.