Микель Артета жорий мавсум якунланганидан сўнг «Арсенал» бош мураббийи лавозимини тарк этиши мумкин. Бу ҳақда Mundo Deportivo нашри хабар бермоқда.
Манба берган маълумотларга кўра, агар испаниялик мутахассис ушбу мавсум якунида Чемпионлар лигаси ёки Англия чемпионатида зафар қуча олмаса, у истеъфога чиқарилади. «Тўпчилар» аллақачон Артетанинг ўрнини эгаллаши мумкин бўлган номзодни аниқлаб бўлишган — бу «Комо» устози Сеск Фабрегасдир.
Фабрегаснинг фойдасига ишлайдиган асосий омиллардан бири унинг «Арсенал»ни ичидан жуда яхши билишидир. Испаниялик мутахассис футболчилик фаолияти давомида 2003 йилдан 2011 йилгача «тўпчилар» шарафини ҳимоя қилган.
