Чоршанба куни Мадриднинг «Реал» клуби чорак финалда «Бавария»га умумий 4:6 ҳисобида имкониятни бой бериб, Чемпионлар лигасидаги иштирокини якунлади.
«Қаймоқранглилар» Мюнхенда кечган жавоб баҳсида 3:4 ҳисобида мағлуб бўлишди — улар учрашув сўнггида бир киши кам бўлиб қолишгач, ўз дарвозаларидан иккита гол ўтказиб юборишди. Катта эҳтимол билан, Альваро Арбелоа шогирдлари жорий мавсумни совринсиз якунлашади.
«Бизга Мбаппе келиши билан «Реал» ҳамма нарсада ғолиб чиқади, деган ғояни сотишган эди, амалда эса акси юз берди. Икки мавсум давомида Ла Лигада ноль, Чемпионлар лигасида ноль, Испания Кубоги ва Суперкубогида ноль ғалаба. Еттита "Эль Класико"да атиги битта ғалаба. Одамларни алдашни бас қилинг», — дея машҳур журналист ва блогер Лаутаро дель Кампонинг сўзларини келтирмоқда Испания ОАВлари.
Килиан Мбаппе 2024 йилнинг ёзида «ПСЖ»дан эркин агент сифатида «Реал»га ўтган эди. Француз футболчиси «Бавария»га қарши кечган ҳар икки ўйинда биттадан гол уришга муваффақ бўлди.
