«Ливерпуль» клуби мавсум якунида жамоани тарк этадиган Муҳаммад Салоҳга ўринбосар сифатида Ян Диомандени кўриб чиқмоқда.

Журналист Флориан Плеттенбергнинг хабар беришича, Ян Диоманде Салоҳнинг ўрнини босиш учун «Ливерпуль»нинг асосий нишонига айланган. «Лейпциг» вингерининг трансфери инглиз клубида қарор қабул қилувчи барча масъуллар томонидан маъқулланган.

Ҳозирда футболчининг Roc Nation Sports агентлигидаги янги вакиллари билан аниқ музокаралар олиб борилмоқда. Шунга қарамай, ҳали келишувга эришилгани йўқ ва клублар ҳам расмий музокараларни бошламаган.

Ўз навбатида, «Лейпциг» Диоманденинг маошини қайта кўриб чиқиш ва амалдаги шартномасини узайтиришдан манфаатдор. Шунингдек, ивуарлик футболчига «ПСЖ» ҳам даъвогарлик қилмоқда ва аллақачон унинг агентлари билан учрашув ўтказишга улгурган.

Маълумот учун, Ян жорий мавсум Бундеслигада 29 та ўйин ўтказиб, 12 та гол урди ва 6 та голли узатмани амалга оширди.