«Барселона» бош мураббийи Ханси Флик клубдаги келажаги ва жамоанинг ривожланиш стратегияси ҳақида гапирди. Немис мутахассиси ўз олдига қўйган энг муҳим вазифаларини санаб ўтди.
«Ҳаётимда иккита катта мақсад бор: биринчиси — «Барселона» билан Чемпионлар лигасида зафар қучиш. Иккинчиси эса янги қурилаётган стадионда жамоа мураббийи сифатида иштирок этиш. Қачон бўлишини билмайман, лекин ўша стадионда бўлишни истайман», — деди Флик.
Шунингдек, мураббий трансфер сиёсати ҳақида тўхталиб, хатоларга йўл қўймаслик лозимлигини таъкидлади:
«Бизда келажак учун ажойиб жамоа ва катта салоҳиятга эга ёшлар бор. Эндиги вазифа — трансфер бозорида «аҳмоқона» ишлар қилмасдан, аниқ ва мукаммал қарорлар қабул қилиш. Жамоанинг тузилмаси мустаҳкам ва биз фақат тўғри йўналишда давом этишимиз керак».
