“Манчестер Сити” бош мураббийи Пеп Гвардиола жамоанинг марказий ҳимоячилари — Абдуқодир Ҳусанов ва Марк Гехи жуфтлигини ҳақида илиқ фикрлар билдирди. Мутахассис ушбу ҳимоячиларнинг кўрсатаётган ўйинда ҳайратда эканлигини яширмади.

“Шунчаки дахшат. Абдуқодир Ҳусанов ва Марк Гехи жуфтлиги ажойиб ўйин кўрсатмоқда. Мен бир неча ҳафта аввал айтганимдек, жамоанинг келажаги порлоқ. Чунки бу ёш йигитлар бир мавсум ичида қанчалик ўсганини кўряпман. Улар ҳали узоқ йиллар давомида жамоамизнинг етакчи футболчилари сифатида ҳаракат қилади”, дейди Гвардиола.

Маълумот ўрнида, “шаҳарликлар” таркибида Йошко Гвардиол ва Рубен Диаш каби етакчи ҳимоячилар жароҳат олгани сабабли, Ҳусанов ва Гехи жуфтлиги асосий таркибда кўпроқ кўриниш бера бошлади. Гвардиол январь ойидан буён сафдан чиққан, Диаш эса сўнгги ҳафталарни ўтказиб юбормоқда. Шунга қарамай, мазкур ёш ҳимоячилар ишончни тўла оқлади: “Сити” охирги тўртта ўйинда ўз дарвозасидан бор-йўғи битта тўп олиб чиқди.

Эслатиб ўтамиз, ўзбекистонлик ҳимоячи Абдуқодир Ҳусанов 2025-йилнинг январь ойида Франциянинг “Ланс” клубидан 33,5 миллион фунт эвазига трансфер қилинган эди. Марк Гехи эса “Кристал Пэлас”дан 20 миллион фунт эвазига келиб қўшилган.