«Бавария» дарвозабони Мануэль Нойер Чемпионлар Лигаси ярим финали доирасида «ПСЖ»га қарши кечган дастлабки ўйинда (4:5) бирор марта ҳам ўз жамоасини қутқара олмади. Парижликлар рақиб дарвозасига беш марта аниқ зарба йўллашди ва уларнинг барчаси гол билан якунланди.

ESPN нашрининг хабар беришича, Нойер бирорта ҳам зарбани қайтармасдан ўз дарвозасидан бешта тўп олиб чиқиб, Чемпионлар Лигаси плей-офф босқичининг сўнгги йиллардаги антирекордини ўрнатди. Дарвозабонлар ўртасида бунга ўхшаш охирги натижа узоқ 2000 йилда қайд этилган: ўшанда «Челси» посбони Эд де Гуй «Барселона»дан бешта гол ўтказиб юбориб, бирорта ҳам сэйв амалга ошира олмаган эди.

Март ойида Мануэль Нойер 40 ёшни қарши олди. Тахминларга кўра, яқин орада Мюнхен гранди сардори клуб билан шартномасини яна бир йилга узайтиради.