Испаниянинг Барселона шаҳрида шаҳмат бўйича ўтказилаётган “XV Open Internacional de Sants, Hostafrancs I la Bordeta” халқаро турнирида ҳамюртимиз Антон Филиппов олтинчи турдан сўнг беш очко жамғариб, пешқадамлар сафида бормоқда.

Дунёнинг 39 давлатидан келган 310 нафар шахматчи (26 нафари халқаро гроссмейстер) иштирокида ўтаётган мазкур нуфузли мусобақада Антон Филиппов Испания, Бельгия, Франция, Италия давлати вакилларини мағлуб этиб, фақатгина венесуэлалик Эдуардо Итурризаганинг қаршилигини енга олмади.

Бугун ўтказиладиган еттинчи турда ҳамюртимиз ҳиндистонлик Б.Адхубанга қарши дона суради.

Халқаро турнирда олти имкониятдан 5,5 очко жамғарган Эдуардо Итурризага (Венесуэла) ва Владимир Бурмакин (Россия) пешқадамлик қилишмоқда. Антон Филиппов ҳисобида 5 очко мавжуд ва у хозирда тўртинчи ўринда бормоқда.

Швейцарча тизимда ўтказилаётган мазкур халқаро турнир 10 турдан иборат бўлиб, ғолиб ва совриндорлар 1 – сентябрь куни маълум бўлади.