«Манчестер Сити» бош мураббийи Пеп Гвардиола Франция Лига 1 раҳбариятининг Чемпионлар лигасида иштирок этаётган «ПСЖ»ни қўллаб-қувватлаш учун ўйинлар вақтини кўчиришга тайёрлиги ҳақидаги хабарларга муносабат билдирди.
«Бундай ҳолатлар бошқа мамлакатларда содир бўлиши мумкин, лекин бу ерда (Англияда) ҳаммаси қандай бўлса, шундайлигича қолади. Мослашиш керак. Агар бу сизга ёқмаса, бориб Франция ёки Португалияда мураббийлик қилинг», — деди Гвардиола.
Шунингдек, Пеп Англия футболидаги анъаналарга ҳурмат билан қарашини қўшимча қилди.
«Менга бу ер ёқади. Ҳали «Барселона»да ишлаб юрган пайтларимдаёқ бошқа мураббийларнинг бу ердаги тақвимдан шикоят қилишларини эшитганимда ҳам айтганман: Англияда доим шундай бўлган. Шундай экан, мен бошқача нарсани кутмаган ҳам эдим».
Гвардиоланинг бу сўзлари АПЛнинг ўзига хос қийинчиликларини қабул қилиш ва унга қарши чиқмаслик кераклигига ишора қилмоқда.
