Канада ҳукумати 2026-йилги жаҳон чемпионати давомида хавфсизликни таъминлаш учун қўшимча 145 миллион Канада доллари (тахминан 106 миллион АҚШ доллари) ажратади.
Бу ҳақда Канада жамоат хавфсизлиги вазири Гери Ананда Сангари маълум қилди.
"Ушбу маблағлар провинциялар ва муниципалитетларнинг турнир давомида одамлар хавфсизлигини таъминлаш борасидаги саъй-ҳаракатларини қўллаб-қувватлайди, шунингдек, ҳуқуқ-тартибот идораларини тадбирни хавфсиз ва юқори савияда ташкил этиш учун зарур ресурслар билан таъминлайди", — деди Сангари Торонтодаги матбуот анжуманида.
Хабарларга кўра, ажратилган маблағнинг 100 миллиони Ванкуверга, қолган 45 миллиони эса Торонто бюджетига йўналтирилади. Таъкидлаш жоизки, аввалроқ Канада ҳукумати хавфсизлик учун 220 миллион Канада доллари ажратган эди, яна 100 миллион доллар федерал агентликлар учун 2025-йилги бюджетга киритилган.
Ҳозирги ҳисоб-китобларга кўра, барча даражадаги (федерал, минтақавий ва шаҳар) хавфсизлик харажатларининг умумий миқдори 1 миллиард Канада долларидан (732,3 миллион АҚШ доллари) ошиб кетади.
2026-йилги жаҳон чемпионати 11 июндан 19 июлга қадар давом этади. Канада турнирнинг 13 та учрашувига мезбонлик қилади.
