«Барселона» ҳужумчиси Роберт Левандовски жамоа билан навбатдаги чемпионликни қўлга киритишга яқин турибди. Польяк ҳужумчиси «кўк-анорранглилар»нинг «Осасуна» устидан қозонилган ғалабасига (2:1) ўз голи билан ҳисса қўшди. Агар бугун Мадриднинг «Реал» жамоаси «Эспаньол» билан баҳсда очко йўқотса, Ханс-Дитер Флик шогирдлари муддатидан олдин чемпионликни расмийлаштиришади.
«Бу мен учун бу ердаги тўрт йил ичида қўлга киритилган учинчи Ла Лига соврини бўлади. Чемпионликни мухлисларимиз билан нишонлашни интиқлик билан кутяпман. Албатта, келажакда ҳам бу туйғуни яна ва яна ҳис қилишни хоҳлардим. Олдинда яна тўртта ўйин бор ва мақсадимиз — уларнинг барчасида ғалаба қозониб, мавсумни 100 очко билан якунлаш», — деди Левандовски DAZN телеканалига берган интервьюсида.
Эслатиб ўтамиз, 37 ёшли ҳужумчининг амалдаги шартномаси мавсум якунида ниҳоясига етади.
