Ла Лига Испания чемпионатининг 34-туридан ўрин олган «Реал»га қарши ўйинда «Эспаньол» мухлислари ўзини тутиши юзасидан шикоят киритди.

Каталония жамоаси ўз майдонида мадридликларга 0:2 ҳисобида имкониятни бой берди.

Ўйин давомида мезбон жамоа мухлислари бош ҳакам манзилига бир неча бор ҳақоратли сўзлар ёғдириб, «Хесус Хиль Мансано – фоҳишанинг ўғли» дея ҳайқиришди. Уларнинг яна бир ҳайқириғи рақиб вингери Винисиус Жуниорга қаратилган бўлиб, футболчини «аҳмоқ» деб аташди.

Лига ушбу ҳолат бўйича Испания Қироллик футбол федерациясининг (RFEF) мусобақаларни ўтказиш қўмитасига ҳамда Спортда зўравонлик, ирқчилик, ксенофобия ва тоқатсизликка қарши курашиш давлат комиссиясига мурожаат қилди.