«Сантос» ҳужумчиси Неймар жамоадоши Робиньо Жуниор билан юзага келган низода ҳаддидан ошганини тан олди. 34 ёшли футболчи машғулот пайтида ёш вингерга нисбатан қўпол ўйнаган, кейин эса у норозилик билдирганида, юзига тарсаки туширган эди. Ҳаммаси 18 ёшли ўйинчининг суперюлдузни «ҳаддан ташқари журъат билан» алдаб ўтганидан бошланган.
«Биламан, чегарадан чиқиб кетдим. Мен аллақачон узр сўрадим ва бу масалани ўзаро ҳал қилдик деб ўйлагандим. Футбол ўйнаган ҳар бир киши яхши билади — бунақа ҳолатлар бўлиб туради: зарбалар ҳам, тарсакилар ҳам, бошқаси ҳам. Бу футбол, ўйиннинг бир қисми.
Ҳаммаси ичкарида ҳал қилиниши, омма олдига чиқмаслиги керак эди. Якунда эса футболдан хабари йўқ одамлар пашшадан фил ясаб, буни ҳаммага тарқатиб юборишди. Иккимиз ҳам хато қилдик, мен эса ошириб юбордим, лекин дарҳол узр сўрадим», — дея Неймарнинг сўзларини келтиради The Touchline.
