«Барселона» янги футболчиларни харид қилиш учун керакли маблағни йиғиш мақсадида Ферран Торрес, Жюль Кунде ёки Рафинья каби ўйинчиларни сотишни режалаштирмоқда. Бу орқали клуб бош мураббий Ханс-Дитер Флик сўраган трансферларга сармоя киритмоқчи.

ESPN хабарига кўра, клуб 2015 йилдан буён илк бор Чемпионлар лигаси совринини қўлга киритишни мақсад қилгани учун таркибни янгилаш зарурлигини тушунмоқда.

Ёзги трансфер ойнасида «Барселона» ҳужумчи ва марказий ҳимоячи позицияларини кучайтиришни режалаштирмоқда. Шу билан бирга, агар Роберт Левандовски ва Ферран Торрес жамоани тарк этса, яна бир вингер ва эҳтимол яна бир форвард ҳам олиниши мумкин. Клуб трансферлар учун тахминан 100 млн евро маблағни айнан футболчилар сотувидан топишга умид қилмоқда, бу эса айрим муҳим ўйинчилар жамоани тарк этиши мумкинлигини англатади.

Марк Касадо ҳамда айни пайтда «Монако»да ижара асосида ўйнаётган Ансу Фати ҳам клубни тарк этиши мумкин. Ёзда «Барселона»нинг асосий трансфер мақсадлари қаторида «Атлетико» ҳужумчиси Хулиан Альварес ва «Интер» ҳимоячиси Алессандро Бастони бор.