«Интер Майами» ҳужумчиси Лионель Месси МЛС мунтазам чемпионати доирасида 100 та голли вазиятда (гол + пас) иштирок этган энг тезкор футболчига айланиб, лига рекордини янгилади.
38 ёшли аргентиналик юлдуз «Торонто»га қарши кечган баҳсда (4:2) битта гол ва иккита голли узатмага муаллифлик қилди. Шу тариқа, Месси 100 очколик маррани забт этиш учун бор-йўғи 64 та ўйин сарфлади. Ҳозирда унинг ҳисобида 59 та гол ва 41 та самарали узатма мавжуд.
Аввалги рекорд Себастьян Жовинкога тегишли бўлиб, у 100 очко жамғариш учун 95 та учрашувда майдонга тушган эди. Шунингдек, кучли бешликдан Робби Кин (96 ўйин), Карлос Вела (98), Хосеф Мартинес (105) ва Дени Буанга (108) ўрин олган.
