«Inter Mayami» hujumchisi Lionel Messi MLS muntazam chempionati doirasida 100 ta golli vaziyatda (gol + pas) ishtirok etgan eng tezkor futbolchiga aylanib, liga rekordini yangiladi.

38 yoshli argentinalik yulduz «Toronto»ga qarshi kechgan bahsda (4:2) bitta gol va ikkita golli uzatmaga mualliflik qildi. Shu tariqa, Messi 100 ochkolik marrani zabt etish uchun bor-yo‘g‘i 64 ta o‘yin sarfladi. Hozirda uning hisobida 59 ta gol va 41 ta samarali uzatma mavjud.

Avvalgi rekord Sebastyan Jovinkoga tegishli bo‘lib, u 100 ochko jamg‘arish uchun 95 ta uchrashuvda maydonga tushgan edi. Shuningdek, kuchli beshlikdan Robbi Kin (96 o‘yin), Karlos Vela (98), Xosef Martines (105) va Deni Buanga (108) o‘rin olgan.