Ҳозирда Бразилия терма жамоасини бошқараётган Карло Анчелотти «Реал» мураббийлари дуч келадиган қийинчиликлар ҳақидаги қарашларга муносабат билдирди.
Футбол оламида «қироллик клуби» юлдузлари қатъий тактик чекловларни ёқтирмаслиги ва майдонда эркин ҳаракат қилишни исташи ҳақидаги назария мавжуд. Кўпчилик Рафаэль Бенитес ва яқинда истеъфога чиқарилган Хаби Алонсо айнан шу «феномен» қурбони бўлганини таъкидлайди. Бироқ италиялик мутахассис бу фикрларга қўшилмайди.
«Йўқ, асло ундай эмас. Бу гаплар худди футболчилар нимани хоҳласа, шуни қиладигандек туюлади, лекин бу нотўғри тушунча. Бу шунчаки бемаънилик, бунга ўхшаш ҳеч нарса йўқ», — дея Анчелоттининг сўзларини келтиради Madrid Zone нашри.
Эслатиб ўтамиз, Анчелоттининг ўзи «Реал»даги фаолияти давомида айнан юлдуз футболчиларнинг кучли томонларига мослаша олиш қобилияти туфайли муваффақият қозонган мураббий сифатида эътироф этилади.
