Hozirda Braziliya terma jamoasini boshqarayotgan Karlo Anchelotti «Real» murabbiylari duch keladigan qiyinchiliklar haqidagi qarashlarga munosabat bildirdi.

Futbol olamida «qirollik klubi» yulduzlari qat’iy taktik cheklovlarni yoqtirmasligi va maydonda erkin harakat qilishni istashi haqidagi nazariya mavjud. Ko‘pchilik Rafael Benites va yaqinda iste’foga chiqarilgan Xabi Alonso aynan shu «fenomen» qurboni bo‘lganini ta’kidlaydi. Biroq italiyalik mutaxassis bu fikrlarga qo‘shilmaydi.

«Yo‘q, aslo unday emas. Bu gaplar xuddi futbolchilar nimani xohlasa, shuni qiladigandek tuyuladi, lekin bu noto‘g‘ri tushuncha. Bu shunchaki bema’nilik, bunga o‘xshash hech narsa yo‘q», — deya Anchelottining so‘zlarini keltiradi Madrid Zone nashri.

Eslatib o‘tamiz, Anchelottining o‘zi «Real»dagi faoliyati davomida aynan yulduz futbolchilarning kuchli tomonlariga moslasha olish qobiliyati tufayli muvaffaqiyat qozongan murabbiy sifatida e’tirof etiladi.