Исроил мудофаа вазири Исраэл Кац “Барселона” футболчиси Ламин Ямални Испания чемпионлиги паради вақтида Фаластин байроғини намойиш этгани учун танқид қилиб, бу ҳаракатни “нафрат уйғотиш” деб атади.

13 май, душанба куни Барселона кўчаларида клубнинг Ла Лигадаги ғалабасига бағишланган тантанали парад бўлиб ўтди. Маҳаллий маъмурларнинг маълумотига кўра, тадбирда 750 мингга яқин киши иштирок этган. Тантаналар вақтида 18 ёшли Ламин Ямал очиқ автобус устида Фаластин байроғини ҳилпиратган. Эътиқоди мусулмон бўлган футболчи кейинчалик ушбу воқеа акс этган суратларни ўзининг Instagram саҳифасига ҳам жойлаштирган.

Исроил мудофаа вазири Исроил Кац ўзининг X (Twitter) саҳифасида футболчининг ҳаракатига нисбатан кескин фикр билдирди.

“Ламин Ямал аскарларимиз 7 октябрь куни яҳудий болалари, аёллари ва қарияларини ваҳшийларча қирғин қилган, зўрлаган ва ёқиб юборган "Ҳамас" террорчилик ташкилотига қарши курашаётган бир вақтда, Исроилга нисбатан нафрат уйғотишни танлади”, деб ёзади Кац.

Маълумот ўрнида, Испания ҳукумати ва мамлакат аҳолисининг катта қисми Исроилнинг Ғазодаги ҳарбий ҳаракатларини кескин танқид қилиб келмоқда. Хабарларга кўра, 2023-йилги ҳужумларга жавобан бошланган уруш натижасида Ғазода 72 мингдан ортиқ фаластинлик ҳалок бўлган.

Ғазодаги гуманитар ҳолат туфайли Исроилга нисбатан жаҳон миқёсидаги норозиликлар спорт ва маданият соҳаларига ҳам кўчган. Хусусан, ўтган йили Испаниядаги “Вуэлта” велопойгаси Исроил жамоаси иштироки сабабли намойишчилар томонидан бир неча бор тўхтатиб қўйилган эди. Шунингдек, Испания Исроил иштирокига норозилик сифатида “Евровидение” қўшиқ танловини бойкот қилган бешта давлатдан бири ҳисобланади.

Эслатиб ўтамиз, Ламин Ямал июнь ва июль ойларида Шимолий Америкада бўлиб ўтадиган Жаҳон чемпионатида Испания терма жамоаси сафида майдонга тушиши кутилмоқда.