Ҳужумчи Маркус Рэшфорднинг «Барселона»даги келажаги ҳамон ноаниқ бўлиб қолмоқда. «Diario SPORT» нашрининг таъкидлашича, клубдагилар Рэшфорднинг ўйинидан мамнун, бироқ раҳбариятда уни 30 миллион еврога сотиб олиш борасида шубҳалар бор.
Айнан шу миқдордаги маблағ «Барселона» ва «Манчестер Юнайтед» ўртасидаги ижара шартномасида сотиб олиш суммаси сифатида кўрсатилган. Миш-мишларга кўра, Рэшфорд Каталония клубида қолиш учун маошининг 40 фоизга камайишига розилик берган.
Жорий мавсумда 28 ёшли Рэшфорд барча турнирларда 48 та ўйинда иштирок этди. У ўз ҳисобига 14 та гол ва 14 та голли узатмани ёздириб қўйишга муваффақ бўлди.
